BAKI, 2 fevral — Sputnik. Myanmanın hökumət başçısı Anq San Sunun yaşadığı ev hücuma məruz qalıb. Sputnik Azərbaycan CNN-ə istinadən xəbər verir ki, naməlum şəxslər onun evinə “molotov kokteyli” atıblar. Hadisə zamanı hökumət başçısı evində olmayıb.
Hələlik hadisəni kimin və hansı səbəbdən törətdiyi bəlli deyil. Nobel Sülh Mükafatına layiq görülən xanım Su, 2017-ci ilin yayında ölkədə müsəlmanlara qarşı törədilən soyqırımda ittiham olunur. O, Arakan vilayətində yaşayan müsəlmanlara qarşı zorakılıq hadisələrinə göz yummaqda təqsirləndirilir. Müsəlmanlar isə hücumun birbaşa Anq San Sunun əmri ilə həyata keçirildiyini bildirirlər.
Xatırladaq ki, Myanmanın Arakan əyalətində yaşayan müsəlmanlara qarşı buddistlər tərəfindən törədilən soyqırım səbəbilə yüz minlərlə insan ölkəni tərk etmək məcburiyyətində qalmışdı.
Birləşmiş Millətlər Təşkilatı ölkədə baş verənləri etnik təmizləmə adlandırmışdı.
