İlham Mustafa, Sputnik Azərbacan
BAKI, 11 yanvar — Sputnik. Qazax rayonunda canavarlar xırdabuynuzlu heyvanlara hücum edib. Sputnik Azərbaycan-ın bölgə müxbiri xəbər verir ki, hadisə rayon mərkəzinə yaxın yerləşən şəxsi təsərrüfatda baş verib.
Dünən gecə saatlarında bir neçə canavar rayon sakini Pərviz Sadiqinin həyətinə girərək 15 baş heyvanı parçalayıb, 10 qoyunu isə yaralayıb. Zərərçəkənin dediyinə görə, təsərrüfatında 25 qoyun və keçi olub ki, yırtıcılar bütün sürüyə hücum edib.
Canavarlar tövləyə tikilinin arxa tərəfindən daxil olub. Hadisə vaxtı təsərrüfat sahibi evdə olsa da, baş verənlərdən səhər saatlarında xəbər tutub.
Hadisə yerinə Qazax Rayon Baytarlıq İdarəsinin əməkdaşları baxış keçiriblər. Ölən və yaralanan heyvanlardan nümunələr götürülərək lazımi tədbirlər görülüb.
