BAKI, 3 yanvar — Sputnik. Yanvarın 2-də Moldova Konstitusiya Məhkəməsi ölkə prezidenti İqor Dodonun səlahiyyətlərini müvəqqəti dayandırıb. Sputnik Azərbaycan RİA Novosti-yə istinadən xəbər verir ki, qərar hakim partiyanı təmsil edən bir qrup deputatın sorğusu əsasında qəbul edilib.
Qeyd edək ki, İqor Dodon bundan əvvəl baş nazir Pavel Filipin təklif etdiyi 7 yeni nazirin namizədliyini təsdiqləməkdən imtina edib. Prezident iki dəfə onların namizədliyini rədd edib. Moldova qanunvericiliyinə görə isə prezident yalnız bir dəfə namizədləri təsdiqləməkdən imtina edə bilər.
Dodonun səlahiyyətlərini ya baş nazir, ya da parlamentin spikeri həyata keçirəcək. Həmin şəxs yeni nazirlərin namizədliyini təsdiqləyərək, onların andını qəbul edəcək.
