Leyla Abdullayeva, Sputnik Azərbaycan
BAKI, 29 dekabr — Sputnik. Yeni il artıq qapıdadır. Bayram günləri yaxınlaşdıqca insanlar yeni ili daha maraqlı, daha yaddaqalan məkanlarda keçirmək barədə düşünürlər. Axtarışda olurlar.
Bayramda regionlara daha çox axın olduğu üçün bölgələrdə yerləşən turizm obyektərinə paytaxtdan daha çox tələbat olur. Bəs həmin obyektlərdə qiymətlər cibimizə uyğundurmu?
Sputnik Azərbaycan-ın şimal bölgəsi üzrə müxbiri bölgədə fəaliyyət göstərən turizm obyektlərinin, hotellərin qiymətləri ilə maraqlanıb. Reklam və anti-reklam amillərini nəzərə alaraq, obyektlərin adlarını yazmırıq və sadəcə rayonlar üzrə qiymətləri diqqətə çatdırırıq.
Şabran rayonu ərazisində yerləşən tanınmış istirahət mərkəzlərində təklif olunan qiymət paketləri hazırda endirimdədir. Endirimdə olan qiymətlərə görə, iki nəfər böyük və bir nəfər altı yaşına çatmamış uşaq daxil, 3 gecə və 4 günlük istirahət 1350 manata başa gəlir. Qeyri-endirim müddətində isə bu məbləğ 1850 manatdır. Hotellərdəki bu qiymət paketinə gündə 3 dəfə yemək, hovuzdan istifadə, fitness mərkəzi və sauna daxildir.
Qubada fəaliyyət göstərən istirahət mərkəzlərində də qiymətlər ürəkaçan deyil. 31 dekabr-1 yanvar tarixlərində hotel nömrələrinin ortalama qiyməti belədir: bir nəfərlik standart otaq 449 manat, suite room 549 manat, iki nəfərlik otaq 899 manat.
Qusarın nəhəng turizm kompleksində yerləşən hotellərdə də vəziyyət, demək olar ki, eynidir. Bir günlük turlar isə, hər adam üçün əlavə 20-25 manata başa gəlir. Buraya yalnız nəqliyyat, gəzinti və səhər yeməyi daxildir.
Söhbətləşdiyimiz hotel təmsilçilərindən qiymətlərin niyə bu qədər baha olması ilə maraqlandıq. Aldığımız cavablar, təxminən eyni oldu: "Hər şeyin qiyməti qalxıb. Üstəlik, lüks xidmət göstəririk".
Müqayisə üçün deyək ki, qonşu Gürcüstanda 1 nəfər üçün 3 gecə, 4 günlük turun ortalama qiyməti 150-210 manat, Türkiyədə isə 300-400 manat civarındadır…
Yeri gəlmişkən, şimal bölgəsindəki turizm obyektlərinin əsas müştəriləri xarici turistlər, xüsusilə Rusiya, Ukrayna və digər MDB ölkələrinin vətəndaşlarıdır.
