BAKI, 28 dekabr — Sputnik. Türkiyə ilə ABŞ arasında viza böhranı həllini tapıb. Sputnik Azərbaycan "Hürriyet"ə istinadla xəbər verir ki, ABŞ-ın Türkiyədəki səfirliyi viza üçün müraciətlərin qəbuluna dair məhdudiyyətləri aradan qaldırıb.
Bunun əlaqədar ABŞ-ın Türkiyədəki səfirliyi açıqlama yayıb.
Açıqlamada bildirilir ki, Türkiyə vətəndaşlarına viza xidmətləri yenidən başlanacaq. Açıqlamada Türkiyə hökumətinin ABŞ-a müəyyən təminatlar veridiyi qeyd edilib. Səfirlikdən bildirilib ki, ABŞ Dövlət Departamenti bu təminatların Türkiyədə viza xidmətlərinin yenidən başlanılmasına kifayət edəcək səviyyədə olduğuna inanır.
Qeyd edək ki, ABŞ-ın İstanbuldakı Baş Konsulluğunun əməkdaşı Metin Topuzun FETÖ ilə əlbir olmaqda təqsirli bilinərək həbs edilməsi ilə əlaqədar ABŞ-ın Türkiyədəki səfirliyi oktyabrın 8-də Türkiyə vətəndaşlarına viza verilməsini dayandırıb. Buna cavab olaraq oktyabrın 9-da Türkiyənin ABŞ-dakı səfirliyi ABŞ vətəndaşlarına viza verilməsini dayandırıb.
