BAKI, 22 dekabr — Sputnik. İraqda İŞİD terror təşkilatının işğalından azad edilmiş ərazilərdə tapılan 100-ə yaxın azərbaycanlı qadın hələ də bu ölkədə nəzarət altındadır. Sputnik Azərbaycan xəbər verir ki, bu barədə modern.az-a Xarici İşlər Nazirliyinin mətbuat xidmətinin rəhbəri Hikmət Hacıyev məlumat verib.
Hacıyevin bildirdiyinə görə, İraq təhlükəsizlik qüvvələri tərəfindən nəzarətdə saxlanılan azərbaycanlı qadınların nə vaxt Azərbaycana ekstradisiya olunacağı bəlli deyil və qadınlarla bağlı məsələ İraqın hüquq-mühafizə orqanları və Xarici İşlər Nazirliyi tərəfindən araşdırılır.
"Hazırda həmin qadınlar İraqın təhlükəsizlik orqanlarının nəzarəti altındadır. Çünki həmin qadınların əksəriyyətinin həyat yoldaşı silahlı qruplaşmaların tərkibində İraq ərazisində qeyri-qanuni fəaliyyət göstəriblər. İraqın təhlükəsizlik orqanlarının keçirdiyi əməliyyatlar nəticəsində həmin zonalar azad olunub və həmin azərbaycanlı qadınlar təhlükəsizlik qüvvələrinin nəzarətinə götürülüblər. Bu məsələ İraqın xüsusi orqanları tərəfindən araşdırılır" deyə H.Hacıyev qeyd edib.
Mətbuat katibinin sözlərinə görə, azərbaycanlı qadınlarla bağlı ciddi faktlar mövcuddur və səfirliyin əməkdaşları qadınlara baş çəkir: "İraqda səfirliyimiz fəaliyyət göstərir. Sadəcə olaraq diplomatik korpusa müvəqqəti işlər vəkili rəhbərlik edir. İraq hökumət qüvvələrinin və Beynəlxalq Qızıl Xaç Komitəsinin dəstəyi ilə səfirliyimizin əməkdaşları həmin Azərbaycan vətəndaşları ilə görüşürlər, onların humanitar problemlərinin həll olunmasına köməklik göstərirlər. İraq məhkəmə hüquq sistemi tərəfindən bu məsələlər nəzərdən keçirilir. Ortada qadınların həyat yoldaşlarının İraqın ərazisində qanunsuz silahlı qruplaşmaların tərkibində fəaliyyət göstərmələri və İraq qanunlarını ciddi şəkildə pozmaları faktı var".
Hikmət Hacıyev bildirib ki, qadınların Azərbaycana ekstradisiya olunması məsələsində hər hansısa vaxt çərçivəsini qeyd etmək doğru olmaz.
"Sadəcə, məsələ gündəmdədir. İraq hökumət orqanları bu məsələ ilə daim təmasdadır. 100-ə yaxın azərbaycanlı qadının olması barədə məlumat var. Amma hər bir fakt ayrı-ayrılıqda araşdırılır. Çünki qadınların əksəriyyətinin üzərində sənədlərinin olmaması hüquq-mühafizə orqanlarının işini bir qədər çətinləşdirir. Həmin qadınların Azərbaycandan nə vaxt çıxdığını konkret demək çətindir. Ona görə də hər bir fakt araşdırılır. Onlar Azərbaycana qayıtmaq istəklərini dilə gətirirlər. Bunun üçün müəyyən qərarlar olmalıdır. İraq huquq-mühafizə orqanları bu məsələni nəzarətdən keçirir".
