BAKI, 21 dekabr — Sputnik. Dekabrın 20-də Bakı Dəmiryol vağzalı tamamilə elektrik enerjisiz qalıb.
Sputnik Azərbaycan-ın həmin vaxt vağzalda olan əməkdaşının verdiyi məlumata görə, orada bütün işıqlar sönüb. İşığın sönməsi nəticəsində vağzalın işi tamamilə iflic vəziyyətə düşüb. Kassalarda kompüterlər sönüb, bilet satışı dayandırılıb, sərnişinlərin vağzalda hərəkəti çətinləşib.
Bu hadisənin nədən baş verdiyini Sputnik Azərbaycan-a şərh edən "Azərbaycan dəmir yolları" QSC-nin İctimaiyyətlə əlaqələr şöbəsinin rəhbəri Sevinc Qədirovanın sözlərinə görə, hadisə qısaqapanma nəticəsində baş verib.
"Dəmir yolu stansiyasının yarımstansiyasının istifadə edilməyən transformatorunda qısaqapanma baş verib. Baş vermiş hadisənin səbəbkarı transformatorun içinə girən pişik olub. Təəssüf ki, heyvan qapalı kontakt nəticəsində ölüb" — deyə Qədirova bildirib.
ADY-nin sözcüsü hadisədən 15 dəqiqə sonra elektrik enerjisi verilişinin bərpa edildiyini bildirib.
Dəmiryolunda işığın sönməsi səbəbindən ASAN-ın kommunal mərkəzinin xidmət terminallarından da bilet almaq mümkün olmayıb.
