Leyla Abdullayeva, Sputnik Azərbaycan
BAKI, 20 dekabr — Sputnik. Qusar rayonun Mucuq kəndi ərazisindəki meşə massivində tapılan meyitin kimə məxsus olduğu məlum olub.
Sputnik Azərbaycan-ın bölgə müxbirinin məlumatına görə, Qusar rayon polis əməkdaşlarının apardığı əməliyyat-axtarış tədbirləri nəticəsində ölən şəxsin Bakı şəhər sakini, 59 yaşlı Mirvahid Musəvi olduğu müəyyənləşib.
Məlumata görə, M.Musəvi may ayında evindən çıxıb, bir daha evə qayıtmayıb. Ailəsinin polisə müraciətindən sonra o, itkin düşən şəxs kimi axtarılıb.
Hazırda Qusar rayon Prokurorluğunda faktla bağlı araşdırma aparılır.
