BAKI, 13 dekabr — Sputnik. "Globalfirepower" portalı 2017-ci il üçün hərbi gücünə görə dünya dövlətlərinin reytinqini hazırlayıb. Sputnik Azərbaycan globalfirepower.com-a istinadla xəbər verir ki, Azərbaycan 2017-ci ildə hərbi qüdrətinə görə 133 ölkə arasında 58-ci yerdə qərarlaşıb.
Həmin reytinq cədvəlinə görə, dünyanın hərbi gücünə görə ən qüdrətli dövləti Amerika Birləşmiş Ştatlarıdır. Onun ardınca Rusiya, Çin və Hindistan gəlir.
Türkiyə bu sırada 8-ci, İran 21-ci, Gürcüstan 82-ci, Ermənistan isə 93-cü yerdə gəlir.
Saytın məlumatına görə, ayrı-ayrı dövlətlərin hərbi gücünü müəyyən edərkən 50 müxtəlif faktor nəzərə alınır. Burada ölkələrin malik olduqları silahlarla yanaşı, onların coğrafi mövqeyi, təbii ehtiyatları, əhalinin sayı və digər amillər də nəzərə alınır.
