BAKI, 27 noyabr — Sputnik. Banklararası ticarətdə dollar yenidən 1.70 manatı keçib. "Bloomberg" terminalında ötən gün dollar sonuncu dəfə 1.6988 manatla ticarət edilirdisə, bu gün hərrac 1.7008 manat məzənnəsi ilə başlayıb və 1.7022 manata qədər yüksəlib. Başqa sözlə, dollar manat qarşısında 0,19% bahalaşıb.
Mərkəzi Bankın bu günə elan etdiyi rəsmi məzənnə isə 1.7001 manat olaraq qalıb.
Bu gün "qara bazar"da isə dolların məzənnəsi dəyişməyib. Fins.az-ın fərdi qaydada valyuta satışı ilə məşğul olan şəxslərdən əldə etdiyi məlumata görə dolların alışı 1.6950 manat, satışı isə 1.7000 manat olaraq qalıb.
Avropa valyutası yenidən bahalaşıb. Belə ki, avronun alışı 1.98 manatdan 2.00 manata, satışı isə 2.00 manatdan 2.20 manat yüksəlib.
"Qara bazar"da avro ilə yanaşı, Rusiya rublu da bahalaşıb. Belə ki, rublun alışı 2.80 qəpikdən 2.85 qəpiyə, satışı isə 2.81 qəpikdən 2.88 qəpiyə bahalaşıb. Başqa sözlə, rublun alqı-satqısı 1,7 —2,4 % artıb.
