BAKI, 20 noyabr — Sputnik. Bu gün Bakıda polis avtomobili qəza törədib. Sputnik Azərbaycan-ın hadisə yerində olan əməkdaşı xəbər verir ki, hadisə saat 15.00 radələrində, Bakı şəhəri Yasamal rayonu Akim Abasov küçəsində, "Azərsu"-nun parkının qarşısında baş verib.
Belə ki, piyada zolağının qarşısında dayanıb piyadanın keçməsini gözləyən "Mercedes" markalı avtomobili, arxadan gələn "99 AP 704" dövlət nömrə nişanlı Post Patrul Xidmətinə (PPX) məxsus avtomobil vurub. Nəticədə "Mercedes" markalı avtomobil sürüşərək yolu keçməkdə olan, 10-12 yaşlı qıza çırpılıb.
Qəza zamanı PPX avtomobilinin ön, vətəndaşa məxsus "Merdeces"-in isə arxa hissəsi ciddi zərbə alaraq, sıradan çıxıb. Xoşbəxtlikdən "Mercedes"-in sürücüsü əyləci buraxmayıb və piyadanın xəsarəti o qədər də ağır olmayıb.
Hadisə şahidləri tərəfindən piyadaya tibbi yardım göstərilməsi üçün əraziyə Təcili Tibbi Yardım çağırılıb.
