BAKI, 23 oktyabr — Sputnik. Ötən həftənin cümə günündən etibarən Masazır qəsəbəsi Əliağa Vahid küçəsi 1 saylı məktəbin qarşısında su kəməri deşilib. Sakinlərin sözlərinə görə, 5 gündən çoxdur ki, su axır, ərazini su basıb. Aidiyyatı qurumlara müraciət etsələr də, müraciətləri cavabsız qalıb.
![Masazır qəsəbəsi Əliağa Vahid küçəsində su kəmərinin partlamasından sonra yaranmış vəziyyət Masazır qəsəbəsi Əliağa Vahid küçəsində su kəmərinin partlamasından sonra yaranmış vəziyyət - Sputnik Azərbaycan](https://cdnn1.img.sputnik.az/img/41245/75/412457594_0:0:774:1032_600x0_80_0_0_7bd8a08603642c0bff1e99e4d6c7c214.jpg)
Sakinlərdən Anar Xəlilov Sputnik Azərbaycan-a açıqlamasında bildirib ki, 4-5 gündür ki, su kəməri deşilib və ətrafa axır: "Məktəbin yolunu su basıb. Uşaqlarımız bu vəziyyətdə məktəbə gedir. Borunun təmiri üçün müraciət etsək də nəticəsiz qalıb".
Məsələ ilə bağlı "Azərsu" ASC-nin mətbuat xidmətinin rəhbəri Anar Cəbrayıllı ilə əlaqə saxladıq. Onun sözlərinə görə, bu gün qurumun əməkdaşları əraziyə baxış keçirib. Məlum olub ki, ərazidə yeraltı su kəməri deşilib: "Bizim asfalt örtüyünü özbaşına qazmağa ixtiyarımız yoxdur. Buna görə də "Azəryolservis"-ə müraciət etmişik. Artıq ərazidə asfalt örtüyün qazılması üçün icazə verilib. Bu gün axşam, uzağı sabaha su kəməri təmir ediləcək".