İradə Cəlil, Sputnik Azərbaycan
BAKI, 4 oktyabr — Sputnik. Bir neçə gündür davam edən yağıntılar şəhər əhalisinin əsaslı narahatlığına səbəb olub. Paytaxtın Xocəsən, Binəqədi, Biləcəri, Masazır və s. ərazilərində evləri, ticarət obyektlərini su basıb. Sputnik Azərbaycan-ın əməkdaşı bu gün Abşeron rayonunun Masazır qəsəbəsi ərazisində olub, sakinləri dinləyib.
Yaxınlıqda yaşayan Samir Abdullayevin sözlərinə görə, Masazır hər il payız-qış aylarında su altında qalır. Sakinlər aidiyyatı qurumlara müraciət etsələr də, bütün müraciətləri cavabsız qalıb.
"Evləri, mağazaları su basır, icra hakimiyyətinə xəbər veririk. Su çəkiləndən sonra gəlib çıxırlar. Məcbur oluruq, suyu özümüz çəkək. Buna görə də bütün mağazalarda xüsusi nasoslar var. Bir balaca yağış yağan kimi nasosları işə salmağa məcbur qalırıq. Yoxsa küçənin suyu mağazamızın, evimizin içində dolur" — Abdullayev danışır.
Sakinlərin sözlərinə görə, bu, uzun illərdir ki, belə davam edir. Məsələyə kökündən həll yolunu heç kim bilmir.
Masazır sakini Hüseyn Quliyev deyir ki, su, əsasən yol kənarında yaşayan sakinlərin evlərinə və mağazalara dolur. Buna səbəb isə yolun çox hündürləşdirilməsidir: "Yolu çəkəndə elə çəkiblər ki, həyətlər, mağazalar alçaqda qalıb. İndi bir balaca yağış olan kimi süzülüb dolur evlərə, mağazalara. Sonra biz həmin suları öz gücümüzə təmizləməli oluruq. Dərdimizi kimə deyək, bilmirəm, amma hər il eyni problemi yaşayırıq".
Masazır sakinləri bildirirlər ki, yolkənarı obyektlərin çoxu su altında qalıb: "Siz üzü Abşeron Gənclər Şəhərciyinə sarı gedin, özünüz görəsəksiniz".
Sakinlərin dedikləri istiqamətdə irəlilədikcə, yolun sağ tərəfində olan obyektlərin çoxunu su basdığının şahid oluruq. Xatırladaq ki, yolun sağ tərəfində avtosalonlar yerləşir. Bəziləri hündür yerdə yerləşdiyi üçün, heç bir problem olmasa da, bir neçəsi alçaqda olduğu üçün bütün avtomobillər su altında qalıb.
Sakinlərin sözlərinə görə, su altında "Bank Standart"a məxsus cərimə meydançasına yerləşdirilmiş avtomobillər və "Aysu" qida şirkəti qalıb. Bir qədər irəlilədikcə, ərazidə yerləşən hotel-restoranları da su basdığına şahid oluruq. Qeyd olunan obyektlərə girişi belə, su basdığı üçün içəri daxil olub, kiminləsə danışa bilmirik.
Masazır sakinləri deyirlər ki, onların bütün problemləri ilə Abşeron Rayon İcra Hakimiyyəti maraqlanmalıdır. Məsələ ilə bağlı Abşeron Rayon İcra Hakimiyyəti və "Bank Standart"-la əlaqə saxlamağa çalışsaq da, zənglərimizə cavab verən tapılmadı.
