Rahim Zakiroğlu, Sputnik Azərbaycan
BAKI, 26 sentyabr — Sputnik. Dünən gecə saatlarında başlayan güclü külək Masallı rayonunda ciddi fəsadlara səbəb olub. Masallı Rayon İcra Hakimiyyətinin Memarlıq və tikinti şöbəsinin müdiri Abbas Mikayılovun Sputnik Azərbaycan-ın bölgə müxbirinə verdiyi məlumata görə, güclü külək və leysan yağışları nəticəsində, rayon ərazisində bir yaşayış binasının dam örtüyü uçub.
"Binanın dam örtüyünün bir hissəsi qoparaq, yaxınlıqda saxlanılan 5 avtomobilin üzərinə düşüb. Nəticədə avtomobillərə ciddi ziyan dəyib" — deyə A. Mikayılov bildirib.
Onun sözlərinə görə, canlı qüvvə və ağır texnikanın köməkliyi ilə ərazi təmizlənməyə, binanın dam örtüyü bərpa olunmağa başlayıb: "Sabahadək binanın dam örtüyü təmir ediləcək".
Bundan əlavə, güclü külək Masallı rayonu ərazisində 5 ədəd irigövdəli ağacı da kökündən qoparıb və elektrik naqillərinin üzərinə aşırıb. Nəticədə naqillər qopub, 110 kv-lıq yarımstansiyada qəza baş verib və transformatorlar sıradan çıxıb.
![Külək Masallı rayonunda ciddi fəsadlara səbəb olub Külək Masallı rayonunda ciddi fəsadlara səbəb olub - Sputnik Azərbaycan](https://cdnn1.img.sputnik.az/img/41201/64/412016471_0:0:1144:719_600x0_80_0_0_9774f189469214a9cab5dece980cc672.jpg)
![Külək Masallı rayonunda ciddi fəsadlara səbəb olub Külək Masallı rayonunda ciddi fəsadlara səbəb olub - Sputnik Azərbaycan](https://cdnn1.img.sputnik.az/img/41201/65/412016571_135:0:1280:720_600x0_80_0_0_d01a26bc297c76028bafb95394d7235e.jpg)
![Külək Masallı rayonunda ciddi fəsadlara səbəb olub Külək Masallı rayonunda ciddi fəsadlara səbəb olub - Sputnik Azərbaycan](https://cdnn1.img.sputnik.az/img/41201/66/412016642_135:0:1280:720_600x0_80_0_0_83ca50d9c402938188ea5a1c534ce0fb.jpg)
![Külək Masallı rayonunda ciddi fəsadlara səbəb olub Külək Masallı rayonunda ciddi fəsadlara səbəb olub - Sputnik Azərbaycan](https://cdnn1.img.sputnik.az/img/41201/67/412016700_102:0:1247:720_600x0_80_0_0_a0745119ffb632e21da3ec856c8ffeaf.jpg)
Masallının bir neçə kəndinə və rayon mərkəzinin bir hissəsinə verilən elektrik enerjisi kəsilib. Hazırda fəsadların aradan qaldırılması və elektrik enerjisinin bərpasi istiqamətində işlər davam etdirilir.