İlham Əhmədov, Sputnik Azərbaycan
BAKI, 3 sentyabr — Sputnik. Adətən ölkəmizin aran rayonlarında, yumşaq təbiət üçün xarakterik olan bölgələrdə yetişən gavalı və nektarin meyvələrini, indi şimal-qərb bölgəmizdə — Qəbələdə də yetişdirirlər. Nümunəvi təsərrüfat kimi yaradılan gavalı və nektarin bağlarının gələcəkdə genişləndirilməsi nəzərdə tutulub.
Sputnik Azərbaycan-ın bölgə müxbiri xəbər verir ki, rayonda ümumilikdə 6300 ha meyvə bağı mövcuddur. Bu bağların əksər hissəsini qarzaqlı meyvə bağları təşkil edir ki, bu da, əsasən rayonun iqlimi ilə əlaqədardır.
![Meyvə yığımı Meyvə yığımı - Sputnik Azərbaycan](https://cdnn1.img.sputnik.az/img/41169/24/411692491_0:0:1200:801_600x0_80_0_0_c93c67cf856df1b3e5a2cf960b01891c.jpg)
Qəbələdə 4827 ha fındıq və digər qarzaqlı meyvə bağları var. Bu bağların 3800 hektarı bar verən ağaclardan ibarətdir. Rayonun Mamaylı, Ovcullu və Nohurqışlaq kəndlərində tumlu meyvə bağları salınır. Artıq bu bağlarda meyvə yığımı başlayıb. Yığılan meyvələrin ölkə xaricinə idxalı ilə əlaqədar işlər də görülür.
Rayonda alıcılıq baxımdan əsas yeri alma, nektarin və gavalı meyvələri tutur. Ümumilikdə bu bağlar 15 hektardan artıqdır. Hazırda gavalı və nektarin bağlarında məhsul yığımı davam edir. Bu bağlarda cari ildən etibarən yüksək məhsuldarlıq dövrü başlayacağı gözlənilir.