BAKI, 16 avqust — Sputnik. Gürcüstanın sabiq prezidenti, Odessa vilayətinin keçmiş qubernatoru Mixail Saakaşvili sentyabrın 10-da Ukraynaya qayıdacağını bəyan edib.
Sputnik Azərbaycan xəbər verir ki, bu barədə Saakaşvili özünün Facebook səhifəsində yazıb.
"Elan edirəm ki, sentyabrın 10-da Polşa ərazisindən Ukraynaya qayıdacağam. Ukrayna hökumətinin bundan sirk düzəltməməsini xahiş edirəm" — deyə o, yazıb.
Xatırladaq ki, Saakaşvili iyulun 26-da prezident Pyotr Poroşenkonun fərmanı ilə Ukrayna vətəndaşlığından məhrum edilib. O zaman ABŞ-da olan eks-prezident Kiyevə dönə bilməyib. Daha sonra Litva, Macarıstan və Polşa kimi Avropa İttifaqı ölkələrini ziyarət etməli olub. Bir neçə dəfə Ukraynaya dönəcəyini bəyan etsə də, hələlik buna müvəffəq olmayıb.
