Leyla Abdullayeva, Sputnik Azərbaycan
BAKI, 7 avqust — Sputnik. Bu gün saat 4-də Siyəzən rayonu ərazisində yanğın baş verib. Sputnik Azərbaycan-ın bölgə müxbirinin verdiyi məlumata görə, hadisə rayonun ərazisində yerləşən dağ massivində baş verib.
Yanğın 60 hektara yaxın ərazini əhatə edib. Yanğın zamanı dağdakı ağaclar yanaraq məhv olub. Əraziyə FHN-nin Siyəzən Yanğından Mühafizə Hissəsinin 2 yanğınsöndürən avtomobili və canlı qüvvəsi cəlb olunub. Çətinliklə də olsa, yanğını söndürmək mümkün olub.
İsti və küləkli hava yanğının həcmini artırsa da, alovun yaxınlıqdakı meşə massivinə və Bakı-Novorossiysk magistral neft kəmərinə yaxınlaşmasının qarşısı alınıb.
Yanğının başlanmasına isti keçən havanın səbəb olduğu zənn edilir.
