BAKI, 4 avqust — Sputnik. Bakının mərkəzində, Nizami küçəsində yerləşən "La Parfumerie" şəbəkəsinin mağazasından külli miqdarda vəsaitin oğurlanması barədə fakt aşkarlanıb. Bu barədə Sputnik Azərbaycan-a hüquq-mühafizə orqanlarından məlumat verilib.
Məlumata görə, mağazanın sahibinin 159 min 472 manatını aparıblar. Firmanın sahibi Arif Vəliyev polisə vəsaitlərin oğurlanmasında, 1990-cı il təvəllüdlü xəzinədarı Nəzakət Namazovadan şübhələndiyini bildirib. Vəliyevin sözlərinə görə, pullar 2016-cı ilin fevralından başlayaraq sirli şəkildə yoxa çıxırdı və həmin hal bu ilin iyuluna qədər davam edib.
Hazırda faktla bağlı Cinayət Məcəlləsinin 178-ci maddəsi (dələduzluq) ilə cinayət içi açılıb. Bakı Şəhər Baş Polis İdarəsinin Təhqiqat və İstintaq İdarəsi faktla bağlı araşdırma aparır. Namazovanın dələduzluqda əlinin olub-olmaması məsələsi araşdırılır.
Qeyd edək ki, hələlik şübhəli qismində heç kəs saxlanılmayıb. Arif Vəliyev özü isə Sputnik Azərbaycan-a bildirib ki, istintaq maraqlarına görə, külli miqdarda vəsaitin oğurlanması faktı ilə bağlı əlavə heç nə deyə bilməz.
