BAKI, 25 iyul — Sputnik. Facebook-un qurucusu Mark Zukerberq SpaceX və Tesla-nın rəhbəri İlon Maskın bəşəriyyət üçün ən böyük təhlükənin süni intellekt olması barədə fikrinə şərik olmadığını bildirib. Zukerberq bu barədə fikirlərini Facebook Live-in on-line yayımında deyib.
Sputnik Azərbaycan CNBC-yə istinadla xəbər verir ki, Zukerberq süni intellekti dünyanın sonunu gətirəcək amil kimi təqdim etməyi məsuliyyətsiz cəhd adlandırıb. Həmçinin qeyd edib ki, süni intellekt bəşəriyyətin gələcəyi üçün müsbət rol oynayır.
"Süni intellekt bizim gələcək həyatımızı yaxşıya doğru dəyişəcək. Amma dünyanın sonu barədə qabaqcadan danışmaq çox məsuliyyətsiz hərəkətdir" — deyə Zukerberq istifadəçilərdən birinin "SpaceX və Tesla-nın rəhbərinin süni intellektin bəşəriyyəti məhvə apardığı barədə fikirlərini necə şərh edərdiz" sualına cavab verərkən deyib.
Bir qədər əvvəl Mask bildirmişdi ki, süni intellekt gələcəkdə bəşəriyyət qarşısında başlıca təhlükə olacaq. Mask bu sahənin dövlət nəzarətinə alınmasına çağırış edib.
