BAKI, 24 iyul — Sputnik. Xəbər verdiyimiz kimi, Bakıda yaşayış binasında yanğın baş verib. Hadisə Yasamal rayonu İnşaatçılar prospekti 44 ünvanında qeydə alınıb. Hadisə yerinə yanğınsöndürənlər cəlb olunub.
Sputnik Azərbaycan-ın hadisə yerində olan əməkdaşının verdiyi məlumata görə, 7 mərtəbəli binanın, 240 kvmetrlik dam örtüyü tamamilə yanaraq sıradan çıxıb. İlkin məlumata görə, yanğına qısaqapanma səbəb olub.
Hələlik bilinən odur ki, yanğın nəticəsində həyatını itirən və xəsarət alan yoxdur. Mənzillərə ciddi ziyan dəyməyib. Sakinlər yanğın başlayar-başlamaz həyətə düşüblər, eyni zamanda Fövqəladə Hallar Nazirliyinə məlumat veriblər.
Hazırda yanğın söndürülüb və yanğının vurduğu ziyan müəyyənləşdirildikdən sonra ictimaiyyətə məlumat veriləcək.
