Ramil İbrahimov, Sputnik Azərbaycan
BAKI, 20 iyul — Sputnik. Bərdə şəhərindəki "Bərdə" Ticarət Mərkəzində yanğın baş verib. Sputnik Azərbaycan-ın bölgə müxbiri xəbər verir ki, səhər saatlarında baş verən yanğın qısa müddət ərzində 12 mağazanı bürüyüb.
Hadisə yerinə Fövqəladə Hallar Nazirliyinin (FHN) Bərdə Yanğından Mühafiz Hissəsinin yanğınsöndürən briqadaları cəlb olunub. Alov söndürülüb və yanğının digər ticarət obyektlərinə keçməsinin qarşısı alınıb.
Yanğın nəticəsində mağazalarda olan elektrik avadanlıqlar, geyim və ərzaq mallarına ziyan dəyib. İlkin ehtimala görə, yanğına mağazalardan birinin elektrik təsərrüfatındakı nasazlıq səbəb olub.
Ümumilikdə 600 m2 sahə yanıb. Yanğın nəticsində ölən və xəsarət alan olmayıb. Hazırda yanğın nəticsində mağaza sahiblərinə dəyən ziyanın miqdarı müəyyənləşdirilir.
