BAKI, 20 iyul — Sputnik. Azərbaycan Respublikasının Ailə, Qadın və Uşaq Problemləri üzrə Dövlət Komitəsi və Azərbaycan Mətbuat Şurasının birgə təşkilatçılığı ilə "Müasir mediada ailə, qadın və uşaq məsələləri" mövzusunda konfrans keçirilib. Milli Mətbuat Günü münasibətilə keçiriləcən konfransda dövlət orqanlarının, mətbuatın və ictimaiyyətin nümayəndələri, jurnalistlər iştirak edib. Tədbirdə Azərbaycanda kütləvi informasiya vasitələrində dövlətin ailə, qadın və uşaq siyasətinin həyata keçirilməsi istiqamətində çıxışlar dinlənilib, qarşılıqlı fikir mübadiləsi aparılıb. Eyni zamanda ailə, qadın və uşaq məsələlərinin mediada işıqlandırılması ilə bağlı ASAN Radio ilə birgə keçirilmiş sorğunun nəticələrinə aid təqdimat nümayiş olunub.
Ailə, Qadın və Uşaq Problemləri üzrə Dövlət Komitəsinin sədri Hicran Hüseynova çıxışı zamanı jurnalistləri təbrik edib və mediada ailə, qadın və uşaq problemlərinin işıqlandırılması istiqamətində olan problemlərdən söz açıb.
Prezidenti Administrasiyasının İctimai-siyasi məsələlər üzrə şöbəsinin müdir müavini Ərəstun Mehdiyev çıxışı zamanı bildirib ki, ailə institutunun qorunub saxlanılması bir çox çətinlilklərlə üzləşir. Bu da bir çox hallarda kənardan gələn meyllərin təsiri altında baş verir".
Ə. Mehdiyev jurnalistlərin bu sahədə ixtisaslaşması üçün təlimlərin keçirilməsini önəmli hesab etdiyini nəyan edib.
Daha sonra Mətbuat Şurasının sədr müavini Müşfiq Ələsgərli mediada ailə, qadın və uşaq problemləri haqqında məqalələrdəki problemlərə toxunub.
Konfrans iştirakçıların müzakirələri ilə davam edib.
Tədbirin yekununda mediada ailə, qadın və uşaq məsələlərinin peşəkar işıqlandırılmasına görə, eyni zamanda bu sahələrdə aparılan araşdırmalar və təhlillər üzrə 2017-ci ilin monitorinqinin nəticələrinə əsasən jurnalistlər mükafatlandırılıb. Mükfatlandırlanlar arasında Sputnik Azərbaycan-ın əməkdaşı da var.
