Leyla Abdullayeva, Sputnik Azərbaycan
BAKI, 17 iyul — Sputnik. Qusarda təsərrüfat sahəsini suvarmaq istəyən gənc kanalda boğularaq ölüb.
Hadisə bu gün saat 12-də Qusar rayonunun Hiloba kəndində baş verib. Sputnik Azərbaycan-ın bölgə müxbirinin verdiyi məlumata görə, 1999-cu il təvəllüdlü Akif Allahyarov əkin sahəsini suvarmağa gedib. O, suyu açıb sahəyə buraxmaq istəyən zaman ürəyi tutub və kanala yıxılıb. Kənd camaatı onun köməyinə gedəndə, artıq gec olub.
Epilepsiya xəstəsi olan Akif Allahyarovun meyiti Qusar Rayon Mərkəzi xəstəxanasına aparılıb və tibbi ekspertizaya təhvil verilib. Ölümün dəqiq səbəbi ekspertizanın rəyindən sonra açıqlanacaq.
Kənd camaatının sözlərinə görə, mərhumun qohumları Qusar Rayon Mərkəzi Xəstəxanasının təcili yardım briqadasını hadisə yerinə gec gəlməkdə ittiham ediblər və tibb işçisini döyüblər.
Hadisə ilə bağlı Qusar rayon Polis Şöbəsində araşdırma aparılır.
