BAKI, 10 iyul — Sputnik. SSRİ xalq artisti, əfsanəvi ifaçı Rəşid Behbudovun "Ya vstretil devuşku" ("Bir qız gördüm") mahnısı Rusiya istehsalı olan yeni "Şəhər" serialında səsləndirilib.
Sputnik Azərbaycan bu barədə filmin kadrlarının yayımlandığı Facebook sosial şəbəkəsinə istinadla xəbər verir.
Filmdə 60-cı illərin atmosferini yaratmaq üçün rejissor məhz məşhur Azərbaycan mahnısını seçib.
Film tarixi mövzudadır. Buradakı hadisələr 1961-ci ildə hər hansı cinayətin baş vermədiyi iddia edilən balaca şəhər olan Strunevoda cərəyan edir. Amma şəhər milis şöbəsinə yeni gələn əməliyyatçı Rodion Stotski tezliklə anlayır ki, bu firavan təməli olan qəribə şəhərdə çoxlu sirlər gizlənir.
Rəşid Behbudovun ifasındakı həmin mahnını filmin birinci seriyasının 15:53-cü dəqiqəsində dinləmək olar.
