Leyla Abdullayeva, Sputnik Azərbaycan
BAKI, 3 iyul — Sputnik. Qusar rayonunda ölümlə nəticələnən ağır qəza olub.
Hadisə bu gün səhər saatlarında baş verib. Qusar rayonunun Kuzun kəndində bir ailə avtomobil qəzasına düşüb. Qəza Qusarçay çayının üzərində olan körpüdə baş verib.
Belə ki, Kuzun kənd sakini Zahid Ramazan oğlu Əzizov idarə etdiyi "Niva" markalı avtomobilini körpünün üstündə geriyə döndərmək istəyib. Bu zaman avtomobil çaya düşüb.
Sürücü Zahid Əzizov yerindəcə dünyasını dəyişib. Avtomobildə olan sərnişinlər — sürücünün həyat yoldaşı Nəzifə Əzizova və digər sərnişin Əbilşah Balamətov Qusar rayon mərkəzi xəstəxanasına çatdırılıb. Hazırda xəstələrin vəziyyəti orta ağırdır.
Qusar rayon Polis Şöbəsində hadisə ilə bağlı araşdırma aparılır.
