BAKI, 20 iyun — Sputnik. Bu gün banklararası ticarətdə dollar yenidən bahalaşıb. Sputnik Azərbaycan fins.az-a istinadən xəbər verir ki, "Bloomberg" terminalında dollar günə 1.70 manat kursu ilə başlayıb. Başqa sözlə, dollar manat qarşısında 0,82% və ya 0,0139 AZN dəyər qazanıb.
Ötən gün "Bloomberg"də dollar ticarəti 1.6861 manat məzənnəsi ilə yekunlaşmışdı. Qeyd edək ki, sonuncu dəfə dollar 1.70 manat həddini may ayının 31-də keçib və 1.7074 manata bərabər olub.
Xatırladaq ki, bir sıra banklar öz müştəriləri üçün müəyyən etdiyi alış-satış qiymətlərini Bloomberg platformasında əks etdirirlər. Bu sifarişlər əsasında başqa bir indeks formalaşır ki, həmin indeks Bloomberg ticarət platforması ilə yanaşı Bloomberg.com saytında da elan olunur.
