BAKI, 2 iyun — Sputnik. Azərbaycan qanunvericiliyində qadınlara hər hansı bir məhdudiyyət qoyulmur. Sputnik Azərbaycan-ın məlumatına görə, bunu əmək və əhalinin sosial müdafiəsi naziri Səlim Müslümov, Avropa Şurası Parlament Assambleyasının (AŞPA) sosial məsələlər, sağlamlıq və davamlı inkişaf üzrə komitəsinin Bakıda təşkil etdiyi "Avropa Sosial Xartiyası prizmasından Azərbaycanda sosial, iqtisadi hüquqların möhkəmləndirilməsi" seminarında deyib.
Onun sözlərinə görə, qanunvericilikdə qadınların çalışa bilməyəcəyi sahə anlayışı yoxdur: "Hamıya sərbəst seçim hüquqi verilir. Qadınlar daha çox tibb və təhsil sahələrini seçirlər. Tibb sahəsində çalışanların təxminən 86 faizi, təhsil sahəsində çalışanların 73 faizi isə qadınlardır".
"Təhsil və səhiyyə əsasən, dövlət sektoruna aid olduğundan, burada əmək haqqı özəl sektora nisbətən aşağıdır. Bunun nəticəsində də qadınların orta aylıq əmək haqqı azdır. Qanunvericilikdə konkret qadın və ya kişiyə görə əmək haqqı məsələsi nəzərdə tutulmayıb" — Müslümov bildirib.
