BAKI, 25 may-Sputnik. “Azərbaycan Beynəlxalq Bankının rəhbərliyi ilə mütəmadi əlaqə saxlayırıq. Vəsaitlərin geri götürülməsi ilə bağlı məhdudiyyət yoxdur”.
Sputnik Azərbaycan-ın məlumatına görə, bunu maliyyə nazirinin müavini Azər Bayramov mayın 25-də Milli Məclisin İqtisadi siyasət, sahibkarlıq və sənaye komitəsinin iclasında deyib.
Onun sözlərinə görə, əhalinin əmanətləri ilə bağlı heç bir problem yoxdur: “Ötən il əmanətlərin sığortalanması ilə əlaqədar tətbiq edilən bütün məhdudiyyətlər aradan qaldırılıb. Həcmindən asılı olmayaraq bütün əmanətlər dövlət tərəfindən qorunur. Biz Beynəlxalq Bankının rəhbərliyi ilə mütəmadi olaraq əlaqə saxlayırıq. Əmanətlərin geri götürməsində heç bir problem yoxdur”.
Nazir müavini deyib ki, ümumilikdə isə əmanətlərin götürülməsi üçün heç bir əsas yoxdur: “Hazırda sırf xaricdən cəlb edilmiş kreditlərlə əlaqədar restrukturizasiya ilə bağlı xarici investorlarla müzakirə gedir. Əhalinin əmanətləri ilə bağlı proseslər öz qaydasındadır”.
