Ramil İbrahimov, Sputnik Azərbaycan
BAKI, 19 may — Sputnik. Bərdədə partlayış baş verib.
Sputnik Azərbaycan-ın məlumatına görə, partlayış nəticəsində 2 nəfər yaralanıb. Hadisə 16:00 radələrində rayonun Ədalət Ədilov küçəsində Nüşabə Naibovaya məxsus evin yaxınlığında baş verib. Partlayış küçədəki kanalizasiya quyusunda qeydə alınıb. Partlayışın şiddətindən kanalizasiya quyusunun üzərindəki beton örtük parçalanıb. Yaxınlıqdakı avtomobilə də ziyan dəyib.
Hadisə nəticəsində Nüşabə Naibova və avtomobilin sahibi Niyaməddin Qarayev xəsarət alıblar. Hər iki yaralı təcili tibbi yardım avtomobili ilə Bərdə Mərkəzi Rayon Xəstəxanasına çatdırılıblar. Xəstəxanadan müxtəlif dərəcəli yanıq xəsarətləri alan şəxslərin vəziyyətinin orta ağır olduğu bildirilib.
İlkin ehtimala görə, partlayışa səbəb quyuya atılan kalsium karbid məhlulunun alışmasıdır. Hadisə ilə bağlı araşdırma aparılır.
