BAKI, 16 may — Sputnik. Aprel ayında Dövlət Miqrasiya Xidmətinə (DMX) əcnəbilərin və vətəndaşlığı olmayan şəxslərin Azərbaycan Respublikasında olduğu yer üzrə qeydiyyata alınması ilə bağlı 46574 müraciət daxil olub. Bu barədə Sputnik Azərbaycan-a DMX-nin mətbuat xidmətindən məlumat verilib.
Bildirilib ki, əcnəbilərə və vətəndaşlığı olmayan şəxslərə Azərbaycan Respublikasının ərazisində müvəqqəti və daimi yaşamaq üçün icazələrin alınması (müddətlərinin uzadılması) ilə bağlı 4248 müraciət, şəxsin Azərbaycan Respublikasının vətəndaşlığına mənsubiyyətinin müəyyənləşdirilməsi ilə bağlı 2704 müraciət daxil olub.
Ötən ay ölkədə olma, habelə müvəqqəti və daimi yaşama qaydalarına əməl etmədən inzibati qanunvericiliyin tələblərinin pozulması ilə bağlı 1547 hal baş verib. 179 nəfərin Azərbaycan Respublikası ərazisində yaşamasını leqallaşdırıb, 919 nəfərə inzibati qaydada çıxarılmamaqla inzibati cərimə tətbiq olunub. 431 nəfər isə cərimə edilərək ölkədən çıxarılıb. 18 nəfər isə ölkədə yaşamaq üçün müvəqqəti icazə sənədini itirib.
