İlham Mustafa, Ramil İbrahimov, Sputnik Azərbaycan
BAKI, 22 aprel — Sputnik. Qərb bölgəsində əsən güclü külək bir sıra fəsadlar törədib. Şiddətli külək nəticəsində yol və parklarda ağaclar qırılıb. Tovuz, Qazax, Ağstafa rayonlarının bəzi yaşayış məntəqələri elektrik dirəklərinin əyilməsi və naqillərin sıradan çıxması səbəbindən elektrik enerjisiz qalıb. Bəzi yaşayış evlərinin dam örtüyünə də zərər dəyib.
Sözügedən rayonlarının enerji təchizatı idarələrindən aldığımız məlumata görə, hazırda küləyin yaratdığı problemlərin aradan qaldırılması üçün gücləndirilmiş iş rejiminə keçilib. Gecə saatlarına qədər elektrik enerjisinin bərpa edilməsi nəzərdə tutulur.
Səhər saatlarında Bərdədə başlayan güclü külək də ciddi fəsadlar törədib. Əsasən rayonun Güloğlular kəndi ərazisində kənd sakinlərinin şəxsi təsərrüfatına ziyan dəyib. Şiddətli külək kənd sakini Pərviz Bəşirova məxsus mal-qara tövləsinin dam örtüyünü atıb. Hadisə zamanı xəsarət alan olmayıb.
Hazırda şiddətli külək davam etsə də, rayonun elektrik təsərrüfatına ziyan dəyməyib. Elektrik enerjisinin verilişində fasilə yaranmayıb.
