BAKI, 13 apr — Sputnik. 2016-cı ildə şəxsiyyətin azadlığı və ləyaqəti əleyhinə 196 cinayət hadisəsi baş verib. Bu barədə Sputnik Azərbaycan-a Dövlət Statitika Komitəsindən (DSK) məlumat verilib.
Ötən il ölkə üzrə 17 adam oğurluğu faktı qeydə alınıb. Onlardan 11 fakt evlənmək məqsədi ilə qaçırılma hadisəsi olub.
Şəxsiyyətin cinsi toxunulmazlığı və cinsi azadlığı əleyhinə olan cinayətlərin sayı isə ötən il 234 olub. Bunlardan 34 fakt zorlama və zorlamaya cəhdlə bağlı cinayət hadisələridir.
Ötən il yetkinlik yaşına çatmayanlar və ailə münasibətləri əleyhinə olan 39 cinayət faktı qeydə alınıb. Onlardan yetkinlik yaşına çatmayanı cinayətkar fəaliyyətə cəlb etmə ilə bağlı 31 fakt, yetkinlik yaşına çatmayanları fahişəliyə və ya əxlaqsızlığa cəlb etmə ilə bağlı 4 fakt və digər 4 fakt qeydə alınıb.
