BAKI, 13 apr — Sputnik. Bu gün Azərbaycan Mərkəzi Bankı (AMB) və Dövlət Neft Fondunun (ARDNF) birgə valyuta hərracı keçirib. Azərbaycan Milli Bankı USD/AZN rəsmi məzənnəsini 1,7026 səviyyəsində müəyyən edib. Bu, dolların rəsmi məzənnəsinin əvvəlki valyuta hərracının nəticəsi ilə müqayisədə 0,0003 manat azalması deməkdir.
Sputnik Azərbaycan "Report"a istinadən bildirir ki, AMB son iki valyuta hərracında dolların rəsmi məzənnəsini 1,70 AZN/USD səviyyəsindən aşağı salmaq istəmədiyini göstərir. Belə ki, aprelin 11-də məzənnə 0,0002, bu gün isə 0,0003 bənd geriləyib. Son günlərdə nağd valyuta bazarında dollar faktiki rəsmi məzənnədən 3,5% aşağı satılırdı.
"Belə ehtimal etmək olar ki, Mərkəzi Bank bu durumdan narahat olub və bazardakı məzənnənin rəsmi məzənnəyə yaxın olmasını istəyib. Sabitləşmə yarandıqdan sonra isə neft qiymətlərində artım davam edərsə dolların ucuzlaşması prosesi yenidən davam edə bilər. Digər ehtimal isə ortamüddətli perspektivdə dolların məzənnəsinin 1,70 AZN/USD səviyyəsində sabitləşdiriləcəyini nəzərdə tutur" — deyə analitiklər qeyd edirlər.
