BAKI, 11 apr — Sputnik. Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşları təhlükəli cinayətkarları saxlayıblar. Bu barədə Sputnik Azərbaycan-a DİN mətbuat xidmətindən məlumat verilib.
Məlumata əsasən, həyata keçirilmiş növbəti uğurlu əməliyyat nəticəsində vaxtı ötmüş qida məhsullarının satışının qarşısı alınıb və beləliklə, qida təhlükəsizliyi təmin olunub.
Belə ki, paytaxtın Binəqədi rayonunda əməliyyatçılar iki nəfər kolbasa satanı — Nicat Babaşi və Vüqar Səlimovu saxlayıblar. Onlara məxsus anbarda vaxtı keçmiş külli miqdarda məhsul aşkar olunaraq müsadirə edilib.
Müsadirə olunmuş məhsullar Ədliyyə Nazirlyinin Məhkəmə ekspertizası mərkəzinə göndərilib. Ekspertiza bu məhsulların qida üçün yararsız olması barədə rəy verib.
