İlham Mustafa, Sputnik Azərbaycan
BAKI, 19 mart — Sputnik. Səhər saatlarında Tovuz rayonunda yol qəzası baş verib. Sputnik Azərbaycan-ın qərb bürosunun məlumatına görə, hadisə Tovuzçay üzərindəki körpüdə qeydə alınıb.
Belə ki, yüksək sürətlə hərəkət edən "VAZ-21011" markalı avtomobil "VAZ-21011" markalı avtomobillə toqquşub. Nəticədə hər iki avtomobilin sürücüsü və 7 sərnişin müxtəlif bədən xəsarətləri alıblar. Xəstəxanaya yerləşdirilən şəxslər Tovuz rayon Bayramlı kənd sakinləri, 1963-cü il təvəllüdlü Zahid Haçıyev, 1967-ci il təvəllüdlü Rasim Qasımov, 1984-cü il təvəllüdlü Samir Paşayev, 1967-ci il təvəllüdlü Azadə Cəfərova, Bakı şəhər sakini, 1983-cu il təvəllüdlü Gündüz Məhərrəmov, Tovuz rayon sakinləri, 1956-cı il təvəllüdlü Afət Axundova və onun baçısı Mətanət Axundovadır. Digər iki yaralıya xəsarətləri yüngül olduğundan hadisə yerində ilkin tibbi yardım göstərilib.
Tovuz Rayon Polis Şöbəsindən verilən məlumata görə, qəzaya səbəb avtomobillərdən birinin qaydalara əhəmiyyət verməyərək, körpü üzərində ötmə əməliyyatı aparması olub.
