BAKI, 19 fev — Sputnik. Dünyanı gəzib görmək eşqi ilə yanan polşalı cütlük, 6 il ərzində 5 qitə gəzərək 150 min kilometrdən çox məsafə qət edib. Üstəlik gündə yalnız 8 dollar xərcləyərək. Sputnik Azərbaycan Sözcü-yə istinadla xəbər verir ki, Karol və Aleksandra Levandovski cütlüyü 6 il əvvəl Polşadan yola çıxır. Bu müddətdə 5 qitədə 50 ölkəni gəzən cütlük, 150 min kilometrdən çox məsafə qət edir.
Bu cütlüyü bir çox səyyahlardan ayıran xüsusiyyətləri isə həmin uzun müddətdə gündə yalnız 8 dollar xərcləmələri olub. İlk mərhələdə 600 dollara aldıqları avtomobilin yanacağı onların xərclərinin ən böyük hissəsini təşkil edirdi. Bu səbəbdən yolda rastlaşdıqları digər səyyahları da avtomobillərinə alaraq, yanacaq puluna ortaq ediblər.
Cütlük əksər vaxtlarda avtomobildə, yaxud müxtəlif ərazilərdə qurduqları çadırlarında yatıb. Onların yaratdıqları bloq Polşanın ən məşhur gəzinti bloqu olub. Beləcə reklamlardan pul qazanmağa başlayırlar, hətta sponsorları da tapılır. Məsələn, Avstraliyadan Amerikaya səfərlərinin xərcini sponsorları ödəyir.
Sonra səyahət işini böyüdərək, bloqlarını kitaba çevirirlər, hətta ikinci kitabı nəşr etdirirlər. Oradan da gəlir əldə etməyi bacaran cütlük, bir tərəfdən də müxtəlif firmalar üçün ekzotik yerlərdə reklam filmləri və fotoşəkillər çəkir. Beləliklə, Karol və Aleksandra Levandovski cütlüyü ilk dəfə ucuz səyahət etməyin mümkünlüyünü sübut edib.
