BAKI, 16 fev — Sputnik. "Bəziləri ailə qurarkən deyirlər ki, "evlənək, amma xoşumuza gəlməsə, boşanarıq". Belə düşüncə ilə ailə qurmaq olmaz".
Sputnik Azərbaycan xəbər verir ki, bunu Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, Milli Məclisdə keçirilən "dəyirmi masa"dakı çıxışı zamanı deyib. Bununla belə, o, yalnız mənfi halları olan ailələr barədə danışmağın da düzgün olmadığını bildirib.
"Müsbət halları olan ailələr haqqında da danışmaq lazımdır. Valideyn məsuliyyəti artmalıdır. Bir ata ki, 14-15 yaşındakı qızını məktəbə buraxmırsa və uşağın ailə quracağını düşünürsə, qurulan belə ailələrin əksəriyyəti normal ailə olmur. Təfəkkür formalaşmalıdır" — Hüseynova qeyd edib.
O, daha sonra əlavə edib: "Elə valideynlər var ki, uşağı ilə dil tapa bilmir. Bizə müraciət edirlər ki, "onu məndən uzaqlaşdırın". Yəni, valideyn uşaqdan imtina etməklə bağlı bizə müraciət edir".
