BAKI, 9 fev – Sputnik. Fransada Flamanvil Atom Elektrik Stansiyasının maşın zalında partlayış baş verib. Sputnik Azərbaycan bu barədə Ouest France-yə istinadən məlumat verir.
Məlumata əsasən, hadisə nəticəsində havaya radioaktiv maddə atılması təhlükəsi yoxdur və yanğın atom reaktorları zonasına keçməyib.
Partlayış 5 nəfərin zəhərlənməsinə səbəb olub.
İlkin məlumata görə, partlayışa qısaqapanma səbəb olub. Tibb işçiləri, xilasedicilər və yanğınsöndürənlər hadisə yerindədirlər.
Hadisədən sonra nüvə reaktorlarından birinin işi dayandırılıb.
Xatırladaq ki, 2012-ci ilin 25 oktyabrında Flamanvil AES-də reaktorlardan birində radiasiya sızması baş vermişdi.
