İlham Əhmədov, Sputnik Azərbaycan
BAKI, 1 fev — Sputnik. Şamaxı fermerləri əlavə torpaq sahələri cəlb etməklə cari ilin məhsulu üçün payızlıq taxıl əkini sahələrini 2075 hektar artırıblar. Dövlət Statistika Komitəsinin (DSK) rayon şöbəsindən Sputnik Azərbaycan-ın bölgə müxbirinə verilən məlumata görə, ümumilikdə, 22 min 112 hektara taxıl səpilib.
"Bunun 14 min 114 hektarı buğda, 7998 hektarı isə arpadır. Ən çox əkin Sabir və Şəhriyar qəsəbələrində, Qızmeydan, Göylər, Çarhan, Məlhəm və bir sıra digər ərazi vahidlərində aparılıb" — şöbədən bildirilib.
O da qeyd olunub ki, rayonun taxılçılıqla məşğul olan fermerləri və fiziki şəxsləri mühüm strateji məhsul olan taxılçılığın inkişafı, bu məqsədlə əkin sahələrinin genişləndirilməsi və məhsuldarlığın artırılması istiqamətində məqsədyönlü tədbirlər görürlər: "Hazırda sahələrdə zərərvericilərə qarşı ciddi mübarizə tədbirləri aparılır".
