BAKI, 24 yan — Sputnik. Qazaxıstanın paytaxtı Astanada Suriya probleminin həlli üzrə danışıqlarda iştirak edən Suriya müxalifətinin nümayəndə heyəti yekun bəyanata imza atmayacaqlarını bildirib.
Sputnik Azərbaycan Milliyet-ə istinadən xəbər verir ki, bu barədə Astanadakı danışıqlarda Suriya müxalifətini təmsil edən rəsmi nümayəndə Yəhya əl-Aridi açıqlama verib.
"Hələlik heç bir sənədə imza atmağı düşünmürük. Rejimin dəvət etdiyi xarici güclər hələ Suriyadan çıxmayıb. Xüsusilə Hizbullah qan tökməkdə davam edir və atəşkəs elan edilməsinə mane olur" — müxalif heyətin rəhbəri Muhammed Alluş bildirib.
Qeyd edək ki, Astanada Suriya danışıqlarının ikinci və sonuncu mərhələsi keçirilir.
