BAKI, 20 yan — Sputnik. 2017-ci ilin Azərbaycanda "İslam Həmrəyliyi İli" elan olunması ilə əlaqədar tədbirlər planı üzərində iş gedir. Sputnik Azərbaycan-ın xəbərinə görə, bunu jurnalistlərə açıqlamasında Dini Qurumlarla İş üzrə Dövlət Komitəsinin (DQİDK) sədri Mübariz Qurbanlı deyib.
O, qeyd edib ki, hazırda bütün aidiyyəti qurumlar tərəfindən "İslam Həmrəyliyi İli" ilə bağlı təkliflər göndərilir: "Tədbirlər planı təsdiq edildikdən sonra müxtəlif tədbirlər həyata keçiriləcək. Tədbirlər planında bütün sahələr nəzərdə tutulub".
M. Qurbanlının sözlərinə görə, İslam həmrəyliyi anlayışını, yalnız dini məsələlərlə bağlamaq düzgün deyil: "İslam həmrəyliyi bütün istiqamətləri, o cümlədən iqtisadiyyatı, mədəniyyəti, humanitar məsələləri, beynəlxalq təşkilatları və digər bütün məsələləri nəzərdə tutur".
