BAKI, 6 yan — Sputnik. Paytaxtın Neftçilər prospektində istifadə edilməyən dəmiryol xətlərinin söküntüsü davam edir. Ötən gün dəmiryol xəttinin biri sökülüb, yol asfalt örtüklə üzlənib.
Ərazidə hazırda söküntü-təmir işləri davam edir. "Azərbaycan Dəmir Yolları" QSC-nin ərazidə söküntü işlərini aparan əməkdaşlarının Sputnik-ə verdikləri məlumata görə, əvvəllər bu ərazidə işıqfor olmaması sürücülər üçün problemlər yaradırmış. Artıq istifadə edilməyən dəmiryolu relsləri söküldüyündən, sürücülərin rahatlığını təmin etmək üçün ərazidə iki işıqfor quraşdırılmasına başlanıb. Sabah isə ikinci istifadə edilməyən yolun söküntüsünə başlanacaq.
QSC-nin ictimaiyyətlə əlaqələr şöbəsinin rəisi Sevinc Qədirovanın Sputnik-ə verdiyi məlumata görə, Neftçilər prospektini kəsən və istifadə olunmayan digər dəmiryolu xətti, prospekt boyunca avtomobillərin təhlükəsiz və rahat hərəkətini təmin etmək məqsədi ilə bu il yanvarın 4-də sökülərək "Azəravtoyol" ASC tərəfindən asfalt örtüklə əvəz edilib: "2017-ci il yanvarın 7-də isə Əhmədli stansiyası istiqamətində Neftçilər prospektini kəsən və istifadə olunmayan digər dəmir yolu sökülərək asfalt örtüklə əvəzlənəcək".
