Politoloq: Mən o optimizmi elə o zaman da bölüşmürdüm
Politoloq Elxan Şahinoğlu deyir ki, gələn ildə Qarabağla bağlı vəziyyət ciddi dəyişməyəcək: “Aprel ayındakı hərbi toqquşmalardan sonra Azərbaycan cəmiyyətinin və siyasi ekspertlərin bir hissəsində belə bir optimizm vardı ki, böyük dövlətlər, o cümlədən Rusiya, Ermənistan hakimiyyətinə təsir etsin. Mən o optimizmi elə o zaman da bölüşmürdüm. Çox təəssüf ki, ümidlər bəslənilən Vyana və Sankt-Peterburq görüşləri də nəticəsiz qaldı. Ardınca həmsədrlərin bura səfərləri də bir rol oynamadı”.
“Gələn il də Qarabağla bağlı vəziyyət ciddi dəyişməyəcək, çünki Ermənistandakı son dəyişiklərə baxsaq görərik ki, orada da konstitusiya dəyişiklikləri olub və indi əsas funksiya prezidentdə deyil, parlametdə olacaq. Aprel ayında orada parlament seçkiləri keçiriləcək. Serj Sarkisyan çalışacaq ki, partiyası müxtəlif vasitələrlə qələbəni təmin etsin və özü baş nazir olsun. Baş nazir olmasa belə, hökumət onun nəzarəti altında olsun və beləcə yenə Ermənistanı idarə etsinlər. Nə qədər ki Ermənistanda hakimiyyətə separatçılar nəzarət edirlər, mən Dağlıq Qarabağ münaqişəsinin masa arxasında həllində irəliləyiş gözləmirəm”, — deyə o bildirib.
