Rahim Zakiroğlu, Sputnik Azərbaycan
Bu gün Lənkəranda “2017-ci ildə Dövlət İmtahan Mərkəzi tərəfindən ümumi (9 illik) orta təhsil bazasında buraxılış imtahanının keçirilməsi modeli haqqında” seminar keçirilib. Seminar Azərbaycan Respublikasının Dövlər İmtahan Mərkəzinin Direktorlar Şurasının sədri Məleykə Abbaszadənin sədrliyi ilə baş tutub.
Məleykə Abbaszadə çıxış edərək bildirib ki, 2008-ci ildən başlayaraq respublikanın ümumtəhsil müəssisələrində yeni təhsil proqramları — kurrikulumlar tətbiq olunur və yeni məzmunlu dərsliklər istifadə edilir. Şura sədri yeni təhsil alan şagirdlərin bacarıqlarının ölçülməsinin aktual məsələyə çevrildiyini və respublikada qiymətləndirmə sahəsində yeni yanaşmaya ehtiyac yarandığını vurğulayıb.
Bunları nəzərə alaraq, 2016-2017-ci tədris ilində orta məktəbin 9-cu siniflərində təhsil alanların biliyinin yekun qiymətləndirilməsi yeni model əsasında həyata keçiriləcək. Buraxılış imtahınının Dövlət İmtahan Mərkəzi tərəfindən mərkəzləşdirilmiş qaydada Azərbaycan bölməsinin şagirdləri üçün — Azərbaycan dili, Rus bölməsinin şagirdləri üçün — Rus dili və hər iki bölmə üzrə riyaziyyat fənnindən ibarət olmaqla iki mərhələdə keçirilməsinin nəzərdə tutulduğu qeyd olunub.
