BAKI, 14 noy — Sputnik. Moldovada səsvermə protokollarının 100% hesablanmasından sonra seçkilərin ikinci turunun qalibi bəlli olub — Sosialistlər Partiyasının lideri İqor Dodon. İkinci turda mübarizə Dodonla, sağ düşərgənin vahid namizədi "Fəaliyyət və həmrəylik" partiyasının lideri Mayya Sandu arasında gedib.
"İqor Dodon 52,18% və ya 835 210 seçici səsi, Mayya Sandu isə 47,82% və ya 765 460 səs qazanıb", — ölkənin MSK-sının məlumatında deyilir.
Bundan əvvəl yerli MSK-nın rəhbəri Alina Russu bəyan etmişdi ki, rəsmi nəticələr bütün ölkə üzrə protokolların orijinalı təqdim edildikdən sonra elan ediləcək.
Seçkiöncəsi proqramında Sosialistlərin lideri bəyan etmişdi ki, Rusiya ilə strateji əməkdaşlıq münasibətlərinin bərpasına çalışacaq, Moldova məhsullarının Rusiya bazarlarına qaytarılması və energetika sahəsində münasibətlərin normallaşdırılması istiqamətində fəaliyyət göstərəcək.
Məşhur moldovalı politoloq Yuri Roşka Sputnik-ə bildirib ki, ölkəsinin siyasi elitası üzərində ABŞ-ın total nəzarəti olduğundan, Dodonun qələbə çalması inanılmazdır. Politoloq iddia edir ki, Soros Fondu və Qərbin maliyyə dairələri çox çalışıb ki, prezident Sandu olsun. Amma artıq Moldova MSK-sı səslərin tam sayıldığını bəyan edib.
İqor Dodon 18 fevral 1975-ci ildə Moldovanın Kalaraşski rayonunun Sadova kəndində anadan olub. İqtisadiyyat və beynəlxalq istisadi münasibətlər üzrə təhsil alıb, iqtisad elmlər doktorudur. 2011-ci ildən Moldovanın Şahmat Federasiyasının prezidentidir. Bu vaxta kimi Moldova Baş nazirinin birinci müavini, iqtisadiyyat və ticarət naziri vəzifələrində çalışıb.
Dodon rusiyapərəst mövqeyi ilə seçilir. Qalib gələcəyi təqdirdə Rusiya ilə bütün istiqamətlərdə əlaqələri bərpa edəcəyini bildirib. Prezident seçkiləri zamanı keçirilən debatların birində isə bəyan edib ki, Krım Rusiyanın tərkib hissəsidir.
Bu ilin yanvarında hakim elitanın apardığı siyasətə qarşı etiraz hərəkatının təşkilatçılarından olub. Ailəlidir, 3 oğlu var.
