BAKI, 2 noy-Sputnik. Səhiyyə Nazirliyi “Aktilize” dərman preparatının istifadəsi zamanı yaranan problemlərlə bağlı xəbərdarlıq edib.
Nazirliyin Analitik Ekspertiza Mərkəzindən “Report”a verilən məlumata görə, adıçəkilən “Aktilize” ticari adlı alteplaza tərkibli həlledici (inyeksiya üçün su) ilə komplektdə venadaxili infuziya məhlulu hazırlamaq üçün liofilizə olunmuş toz flakonda dərman vasitəsinin həll olmasında yaranan texniki şikayətlər bildirilib.
Son aylar "Boehringer İngelheim" şirkətinə bəzi ölkələrdən Aktilize 50 mq preparatından çoxlu texniki şikayətlər daxil olub. Şikayətdə bildirilir ki, preparatın həll olması zamanı rezin tıxac flakon daxilinə itələnir. Bu flakonun istifadəsini yararsız edir və müalicə üçün yeni flakona ehtiyac yaranır. Az miqdarda 10 mq və 20 mq dozalara aid şikayətlər də alınıb. Hazırda texniki şikayətin yaranma səbəbləri araşdırılır. Hələlik dəqiq səbəb müəyyən edilməyib.
Boehringer İngelheim şirkəti Aktilize preparatının istifadə təlimatına ciddi əməl olunmasının vacibliyini bildirir. "Aktilize" preparatının həyati vacibliyini nəzərə alaraq, tibb müəssisələrində kifayət qədər preparatın ehtiyatının saxlanılması tövsiyyə olunur. Preparatın istifadəsi zamanı yaranan problemlərin şirkətə bildirilməsi xahiş olunur. Yaranmış situasiyanın aradan qaldırılması üçün şirkət bu sahədə bütün tədbirləri gücləndirib.
Məsələ ilə əlaqədar tibb elmləri doktoru Adil Qeybulla Sputnik-ə açıqlamasında deyib ki, “Aktilize” trombolitik dərman preparatıdır: “Trombları, xüsusilə də təzə trombları əritmədə, miokard infarktında, trombotik kəskin işemiyada istifadə olunur. Bu preparat kifayət qədər moderndir. Sadəcə bunun əmtəə formasında hansısa bir texniki qüsur aşkarlanıbsa, elə bu, dərmanın istehsal yerini şübhə altına alır. Ola bilər ki, preparat haradasa 3-cü ölkədə və s. istehsal olunub. Buna diqqət etmək lazımdır. Ola bilməz ki, Avropa istehsalı olan dərman bu şəkildə texniki qüsura malik olsun. Yəni, dərmanın rezininin deşilməsi zamanı içəri düşməsi və s. hallar əslində onun keyfiyyət parametrlərindən xəbər verir”.
Ekspert bildirib ki, dərman maddələrinin dövlət reyestri buna görə lazımdır ki, hansı dərmanda qüsur oldusa, lazımi firmaya məsələ ünvanlana bilsin. Təəssüf olsun ki, Azərbaycanın bu gün xaotik dərman bazarında bütün dərmanlar ilə bağlı bu məsələni həll etmək mümkün deyil. Düşünürəm ki, haqlı iradlardır və araşdırılmalıdır.
Həkim Mahir Məmmədli Sputnik-ə açıqlamasında deyib ki, hansısa bir dərman preparatının vaxtı keçəndə Səhiyyə Nazirliyi kütləvi informasiya vasitələrində elan verir ki, bunu həkimlər istifadə etməsinlər. Son zamanlar dərman bazarında məhsulların əksəriyyətinin keyfiyyəti bizi qane edir, xüsusilə Avropanın inkişaf etmiş firmalarının dərmanları. Əvvəlki dövrə nisbətən indi keyfiyyətli dərmanlar artıb. Əvvəl Hindistan, Pakistan dərmanları satışda çox idi. Hazırda bunların sayı azalıb.
