BAKI, 29 okt — Sputnik. Türk lirəsinin dollar qarşısında ucuzlaşması davam edir. Dollar dünən, 3.1273 türk lirəsi ilə yeni tarixi rekord həddə yüksəlib. Sputnik haberler-ə istinadla xəbər verir ki, inkişaf etməkdə olan bütün ölkənin pul vahidləri dollar qarşısında dəyər itirib.
Dollar niyə bu qədər sürətli dəyər qazandı, Türk lirəsi itirdi? Tək bir cavab yoxdur, amma səbəblərin başında ABŞ-ın Federal Ehtiyatlar Sistemindən (FED) gözlənilən qərar gəlir.
FED-in dekabr ayında uçot dərəcəsini qaldırma ehtimalı 78 faizə qədər yüksəldi. Bu, dolların güclənməsini təmin edir.
Ayrıca Türkiyənin daxili siyasətindəki hadisələr də Türk lirəsinə təsir edir. Yeni konstitusiya və prezident üsul-idarəsinə keçid ilə bağlı müzakirələrinin yenidən gündəmə gəlməsi, geosiyasi risklər — Türkiyə sərhədlərində davam edən müharibələr Türk lirəsini zəiflədir.
Ekspert Eda Öndər Öztürk deyib ki, güclü dollar təzyiqedici taktikanı davam etdirdiyi müddətdə, digər valyutaların durumu ağırlaşacaq: "ABŞ-da prezident seçkiləri keçirilənə qədər mərkəz bankların yol xəritələrində marşrut dəyişməyəcək. ABŞ-da keçiriləcək prezident seçkilərinin FED-ə də təsir edəcəyi gözlənilir".
"Eynilə 100 metr məsafəyə qaçış yarışında iştirak edən idmançı kimi dolların sürətinə kimsə çata bilmir. Dollar dünən bazarda üst-üstə rekordlar qırdı və 3.1273 türk lirəsi ilə tarixi zirvəsinə çatdı. Yüksəlişin davam edəcəyi istisna deyil", — mütəxəssis bildirib.
