BAKI, 25 okt — Sputnik. Norveç alimləri qadın orqanizminin qocalmasına səbəb olan bir sıra faktorları analiz ediblər. Sputnik xarici KİV-lərə istinadla xəbər verir ki, bioloqlar 20 il müddətində bu istiqamətdə araşdırma aparıblar və maraqlı nəticələr əldə ediblər.
Sən demə, xanımlarım çox yaşamasına onların yumor hissi səbəb olurmuş. Araşdırmanın nəticələri zarafatcıl və lətifələri sevən qadınların daha uzun müddət yaşadığını aşkara çıxarıb.
Onların 73%-i ürək və qan-damar xəstəliklərindən, 84%-i isə infeksion xəstəliklərdən vəfat edir. Ümumiyyətlə, elm adamlarının apardığı monitorinqin nəticələri göstərib ki, çox gülmək və zarafat qadınlar arasında erkən ölüm riskini də 48% azaldır.
Qeyd etmək lazımdır ki, sözügedən araşdırma gülüşün ömrü uzatdığı barədə iddiaları təsdiqləyib. Mütəxəssislərin sözlərinə görə, kişilərdə isə məsələ bir qədər başqa cürdür. Yumor hissi güclü cinsin nümayəndələrini yalnız infeksion xəstəliklərdən qoruya bilir. Amma onlarda yumorun ürək-damar sisteminə heç bir təsiri yoxdur.
