BAKI, 19 okt — Sputnik. İran Hərbi Dəniz Qüvvələrinə məxsus "Dəmavənd" raket gəmisi və "Covşan" kater gəmisi Bakı buxtasına yan alıb. Bu barədə Sputnik-ə AR Hərbi Dəniz Qüvvələrinin (HDQ) komandanının müavini Natiq Bağırov məlumat verib.
Onun sözlərinə görə, səfər sülh məqsədi daşıyır. Bu, Azərbaycanın müstəqilliyi ərzində və Azərbaycan HDQ-nin yaradılmasından sonra İran hərbi gəmilərinin ölkəmizə ilk səfəridir.
Bağırov qeyd edib ki, İranın nümayəndə heyəti ölkəmizdə üç gün olacaq. Səfərin zəngin proqramı var. Qonaqlar səfər çərçivəsində Fəxri Xiyabanı, ümummilli lider Heydər Əliyevin və onun xanımı Zərifə Əliyevanın məzarlarını, Şəhidlər Xiyabanını ziyarət edəcəklər. Sonra birinci dərəcəli kapitan Əbdülhüseyn Zəfərinin rəhbərlik etdiyi nümayəndə heyəti Azərbaycanın Hərbi Dəniz Qüvvələrinin komandanlığı ilə görüşəcək. Nümayəndə heyəti Azərbaycanın Hərbi Dənizçilik Məktəbində və Heydər Əliyev adına Ali Hərbi Məktəbdə olacaqlar.
Qonaqların AHDM-dəki görüşündən sonra, məktəbin Dənizçilik fakültəsinin tələbələri İran gəmilərində olacaqlar. "Dəmavənd" və "Covşan" gəmilərinin ekipajları da Azərbaycanın HDQ-nin gəmilərinə baş çəkəcəklər.
Səfərin üçüncü günündə Azərbaycan və İran gəmilərinin komandaları arasında futbol üzrə yoldaşlıq görüşü keçiriləcək. Nümayəndə heyətinin Bakı gəzintisi də planlaşdırılıb.
