Lənkəranda 10 min nəfərdən çox seçici səs verib

BAKI, 26 sen — Sputnik. 73 saylı Lənkəran Dairə Seçki Komissiyasına (DSK) daxil olan bütün məntəqələrdə səsvermə başlayandan xüsusi fəallıq var. Sputnik-in bölgə müxbiri xəbər verir ki, saat 10.00-dək dairə üzrə seçiciləri 9,08%-i, yəni 3464 nəfər, 12.00-a olan məlumata əsasən isə, 28,6%-i (10100) nəfər artıq öz səsvermə hüququndan istifadə edib.

Xatırladaq ki, prezident İlham Əliyev iyulun 18-də Konstitusiyaya dəyişikliklərin edilməsilə bağlı 26 sentyabr 2016-cı ildə referendumun keçirilməsi haqda sərəncam imzalayıb. Konstitusiyaya dəyişikliklərdə Azərbaycanda birinci vitse-prezident və vitse-prezident institutlarının yaradılması təklif olunur.

Konstitusiyanın 100-cü — "Azərbaycan Respublikası prezidentliyinə namizədliyə tələblər" maddəsindəki "Azərbaycan Respublikasının Prezidenti yaşı 35-dən aşağı olmayan, Azərbaycan Respublikasının ərazisində 10 ildən artıq daimi yaşamış, seçki hüququ olan, əvvəllər ağır cinayətlərə görə mühakimə olunmamış, digər dövlətlər qarşısında heç bir öhdəliyi olmayan, ali təhsilli, ikili vətəndaşlığı olmayan Azərbaycan Respublikasının vətəndaşı prezident seçilə bilər" cümləsindən yaşı 35-dən az olmayan sözünün çıxarılması tələb edilir. 101-ci maddənin I hissəsi — "Azərbaycan Respublikası Prezidenti seçkilərinin əsasları" dəyişdirilərək prezidentlik müddəti 5 ildən 7 ilə qaldırılacaq.